أم الصابرين ترد على دعوته: حن عليا يا سيسى!

أم الصابرين ترد على دعوته: حن عليا يا سيسى!

كتب محمود خليل:

"أم الصابرين" سيدة ريفية بسيطة تسكن فى بدروم احد منازل مصر العتيقة .. خرجت ضمن آلاف المصريات ترقص وتهلل وتؤيد السيسى فى 30 يونيو.. لكنها صدمت بعدما وجدت حياتها تزداد سوء ولا تعرف لماذا.. وحينما شاهدته – سيسى - يطالب المرأة المصرية بان تقف بجانب مصر انطلق لسانها كأنها لم تتحدث منذ زمن بعيد .. وكان هذا ردها على دعوة السيسى..

 كان نفسى يا سيسى اجف جمب مصر بس أنت عارف يا سيسى من ساعة ما مسكت وأنت مغلى الحاجة ناااار . .. وانا باطبخ دلوجتى ولو الطبيخ اتحرج ممكن أروح فيها او جوزى يطلجنى .. يرضيك يا سيسى اموت أو جوزى يطلجنى .. كان على عينى يا خويا .. اجف أنت جمبها لغاية ما اتغدى واغسل المواعين واشوف العيال وبعدين هاجى اجف جمبها شوية وابقى كمل أنت يا خويا علشان رجليا بتوجعنى من كتر الوقفة .. آه والله يا خويا ما اهو أنت من ساعة ما غليت الدوا وأنا مش قادرة اشتريه .. أعمل أيه يا خويا بأه .. وبعدين انت عارف العيال وتربيتهم .. ضهرى مش جادرة اصلبه حتى أسأل جوزى .. الراجل الله يكرمه مش بيطلب منى حاجات كتير .. دا حتى أنت من ساعة ما بقيت تحط الهباب بتاع الخصوبة ده فى القمح وهو يعنى صعبان عليا .. باقولك ايه يا خويا ما تقف أنت جمبها مش انت الراجل .. آه وانت كمان الريس ما شاء الله عليك وكمان متربى من خير الجيش .. وبتقبض أد كده .. باجولك ايه يا خويا .. أنت مش ممكن تسلفنى أد مية متين تلتميت جنيه اجيب فرختين من اللى بيحقنوهم بالسم الهارى اللى بيزود وزنهم وكمان العيال نفسهم فى حتة لحمة بس مش عارفة الجزار هايكون عنده لحم حمير والا لحم ميت والا ممكن يكون لحم كلاب وقطط .. ما انا والله يا خويا مش باعرف فى اللحم .. اجولك أنا هاخلى الراجل يبقى يشترى .. مقلتليش يا خويا انت هاتزود التموين أمتى .. يا روحى الراجل من ساعة الاسعار ما غليت ومبجاش مكفى البيت

.. التموين كان يدوب بيكفى لخر الشهر .. دلوقتى الطبيخ اورديحى وبنكمل بقية الشهر شوية فول على طعمية .. والله حتى دول مش عارفين نشتريهم .. باروح يا خويا للعربية بيدينى لحستين فى الطبج بجنيه وجرصين طعمية اد الترمسة بجنبه .. حتى الجبنة يا خويا اتحرمنا منها .. تصدق يا سيسى كيلو الجنبة الجريش بق بعشرين جنية والا الجبنة البيضا يا خويا بقت بتلاتين متجولش لحمة والا كانت لحمة يعنى .. أيه القرف اللى أنت معيشنا فيه ده .. يا خويا دا كنت هاطلج لما خرجت الشارع ارجص لما وافقت تبقى ريس .. قوم الراجل ضربنى وجرنى من شعرى فى الشارع والناس تحوش وهو الف راسه يطلجنى بعد ما يدينى العلجة التمام .. وانا اعييييط لغاية جلبه ما رق والناس حجزت ما بينا وقلت له خلاص توبة ارجص لسيسى تانى .. قالى ولا ترجصيلى يا ولية.. قلت حاضر يا خويا ولا هارجصلك .. ومن ساعتها يا خويا وهو يجي من الشغل ياكل وينام ويدينى ضهره .. آل أيه تعبان

.. طيب والنبى يا سيسى متعرفش هو تعبان من أيه .. آلهى يسترك يا خويا ابعت له دكتور يشوفه ويعالجه .. يا عينى دا خس خالص والا العيال ماجولكش عدمانين يا عينى حتى الواد الكبير مبجش يقدر يشيل حاجة .. والوسطانى ياعينى العيال الاصغر منه يضربوه فى الشارع ومش بيجدر يرد عليهم والصغير يا خويا راخر نايم طول النهار آل ايه النوم راحة وعبادة طالما مش جادرين نأكله زى حمادة زميله اللى ابوه ضابط وبياكل اكل حلو .. آه والله يا خويا الواد بيجى يجولى حمادة كان بياكل النهاردة بهجورجر وحاجات كده معرفش اسمها ايه من اللى بنسمعها فى التمثليات والافلام والاعلانات .. والا الاعلانات يا خويا ديه حاجة حلوة خالص اشى فلل وشقق وعربيات وعشش ع البحر وحاجة كده اسمها كموند .. والله نفسى يا خويا الراجل يودينى البحر بس تعرف لما جلت مرة نصيف زى الناس راح ضربنى بالجلم وقالى احنا فين يا ولية فلتانة وفين الكبرات اللى بيصيفوا .. وفين الفلوس ما هو من ساعة سيسى ماجه وهو منشفها علينا يا ولية .. الا صحيح يا سيسى انت منشفها علينا بجد والا الراجل بيضحك عليا .. الا حق ليكون متجوز عليا ما هو كل الرجال عيارها فلت يا خويا .. بس لأ دا مبجاش يقدر يصلب طوله هايتجوز عليا ازاى ..

اه والله يتجوز ازاى .. يكونش بيخونى لما بيروح الشغل ويكون عند مراته التانية .. هو ممكن ياخويا تكلم حد فى الجسم يراقب جوزى يشوفه بيخونى والا لأ.. بس انا حلوة ومدلعاه ع الاخر يخونى ازاى .. مش انا حلوة يا خويا .. قول الحج أنا حلوة والا لأ .. بس انت يا سيسى غلطان برضه سايب كل حد يعمل اللى على كيفه الاسعار مولعة والاكل مش تمام بيجيب السرطام اللى بيجولوا عليه ده والعياذ بالله بيموت الناس .. والغريبة كل ماكلم حد يجي يزورنى يقولى المواصلات غالية نار هو انت غليتها نار ليه ياسيسى .. الا بيقولوا الضولر غليته كمان .. انت غليت كل حاجة ليه ياسيسى .. دا حتى الخياطة اللى كانت بتفصلى الجلابية زودت اجرتها عشرة جنيه وبتجولى الضولر غلى .. والا العيال يا خويا كانوا بيحلقوا بعشرة جنيه آل ايه الحلاق جالهم زيادة عشرة جنيه علشان الضولر .. هو ايه الضولر ده يا خويا اللى مخلى كل الناس بتغلى الحاجة لما بيغلى  .. والنبى عايزة اشوفه يا سيسى .. اتملى منه واشوفه بعينى واطلب منه يرخص شوية علشان الغلابة اللى زيى .. ممكن تخلينى اشوفه يا سيسى .. طيب انا وجفت جنب مصر شوية ممكن تصورنى واطلع فالتفزيون .. دى تبقى حاجة ايمة والله وانا واقفة جمب مصر وبتوع البلد يشوفونى وانا واجفة جمبها وعاملة كده بايدى زى انت مابتعمل .. اجولك بلاش علشان عيون البنت بنت حميدة وامها وحشة اخاف اسجط من طولى لو شفونى جمب مصر ولو سجطت من طولى مين هايراعى الراجل والعيال وممكن اموت فيها ويروج يجوز غيرى ويجيب مرات اب للعيال تطلع عينهم .. يرضيك يا سيسى الراجل يجيب مرات اب لولادى وتطلع عينهم

.. مشكلة كبيرة جوى لو وقفت جمب مصر ... انا فاكرة امى وجفت جمب مصر جدى راح راجعها بالقلم وقالها اتلمى يا بت الكلب بتخرجى الشارع ليه وتجفى جنب الناس .. الا حقيقى يا سيسى هى مصر دى فين .. يعنى اروح اجف جمبها فين .. هى حلوة كده وبتلبس زى بنات ذوات .. عارف الاميرة انجى يا سيسى .. اه اللى جت فى التيفزيون وابن الجنينى كان عايز يجوزها .. تفتكر يا سيسى ابن الجنينى ممكن يجوز انجى .. هو انا فاكرة فلم جه وفيه بيجولوا جواز عتريس من فؤادة باطل باااطل .. بس معرفتش ايه اللى بطله طالما شيخ البلد وافج والعمدة وافج وشيخ الجامع وافج .. هو باطل ليه يا سيسى .. جولى والنبى يا خويا احسن يكون جوازى انا كمان باطل .. داهية سودا ليكون باطل ويكون العيال ولاد حرام .. اصل الحرام مبيدومش يا خويا .. واللى بيجى من حرام بيروح حرام .. وكمان بياخد الحلال معاه .. تفتكر يا سيسى عيشتنا حرام والا حلال .. هو انا لو موجفتش جمب مصر اكون عملت حرمانية .. ياريت والنبى انت تجف جمبها لتكون محتاجة مساعدة او مش جادرة تقف ورجليها وجعانة .. طيب ليه يا سيسى البنات الذوات مش بيجفوا جمبها ويتصوروا تصاوير .. هه .. انا سمعت ان اللى بيجف جمبها بياخد جرشنات كتييير اوى يعبوا جفف .. طيب انا لو وجفت جمبها هاخد جفة فلوس .. والا بنات الذوات بس اللى بياخدوا .. والله مانى عارفة يا سيسى اجف والا لا وهاجدر والا لا .. حاجة تحير صح .. اجولك يا سيسى انا هاجف جمبها بس سايجة عليك النبى يا شيخ ترخص الحاجة وتعالج الراجل والعيال وتشترى لى كام جلابية اشية كده اتعايج بيها .. ولو ممكن .. والله مكسوفة يا سيسى ... تديى الراجل اد متين تلميت جنيه وتجيب لى جزازة ريحة اتريح بيها بليل علشان الراجل يمكن .. يمكن .. هه

 .. متكسفنيش بجه ... انت عارف .. آه يا خويا ونسيت اجول لك كنت عايزة شوجة بدل البدرون اللى ساكنة فيه .. اصل اللى رايح واللى جاى كاشفنا ولا ريحة الشارع والمجارى اصل ياخويا محدش بينضف الشارع وبيجولوا ايه .. انتوا ناس فجرا متستهلوش نضافة ... طيب ليه.. طيب انا سمعت انهم بياخدوا خمسة جنيه حتة واحدة على الكهربا علشان ينضفوا الشارع .. والنبى يا خويا قولهم ينضفوا الشارع .. وجولى يا خويا هو انت غليت الكهربا تانى ليه .. والنبى يا خويا الجنى ونص اللى قلت عليهم ياكلوا العيال شوية عيش حاف من بتاع البطاجة .. والا العيش ده يا خويا راخر مبجاش يتاكل .. وكل ماروح الفرن واقوله العيش ملعبج ومايتكلش يقولى لو كان عجبك خدى مش عاجبك روحى اشتكى .. اقوله يا بنى ده عيش كله عجين .. راح واخد العيش ورماه ع الارض وجالى متجيش هنا تانى روحى اى فرن تانى معنديش عيش .. يرضيك كده يا سيسى .. طيب مش بيجولوا فى مفتش تموين .. مش بيعمل حاجة ليه .. ممكن يا خويا توصى صاحب الفرن يدينى عيش كويس .. عارفة تجلت عليك بس اعمل ايه .. ما انا كل ما تكلم يجولولى روحى لسيسى اللى رقصتيله .. مش انا رقصت لك يا سيسى وكنت هاتلج بسببك .. ياريت والنبى توصى صاحب الفرن يدينى عيش يتاكل .. انا عارفة انا باتكلم كتير بس اعمل ايه محدش بيسمعنى .. جلت اتكلم معاك لما طلبت اجف جمب مصر 

.. الا صحيح يا خويا هى مصر والا ماسر .. اصلى طول عمرى باقول مصر وانت بتقول ماسر وبقيت محتارة .. والنبى يا خويا هاجف جمب ماسر بس والنبى حللى مشاكلى.. علشان خاطرى يا سيسى حل مشاكلى قبل ما اموت اصلى حاسة انى هاموت فى البدرون ده وجوزى هايتجوز ويجيب مرات اب للعيال .. طيب ممكن تمنع جوزى يتجوز عليا لما اموت يا سيسى .. ممكن تاخد العيال منهم وتربيهم لو جاب لهم مرات اب .. والله قلبى معبى كتير يا سيسى .. عارفة عطلتك عن شغلك .. عارفة شغلة المريسة دى عورة خالص وبيجولوا تجيلة اوى واللى بيشتغلها مش فاضى .. الا جولى يا خويا انت متجوز .. عندك عيال وعامل ايه مع امهم .. والله نفسى اجف جمب مصر وتكون مرتك جمبى وتجف برضه جمب مصر وناخد تصويرة .. وساعتها بجة اطلع فى التيفزيون واتفشخر انا واجفة جمب مصر مع مرت سيسى .. طب ايه رايك لو وجفنا احنا التلاتة جمب مصر .. ممكن يا سيسى .. اجولك حاجة انت تجيب كل بنات الذوات وانا هاجيب كل نسوان الحارة وابعت البلد اجيب نسوان البلد كلتهم ونجف جمب مصر .. ياه والله هاتبجى وجفة عال العال .. مش كده يا سيسى .. انت مش بترد عليا ليه ياخويا .. والنبى عارفة وجعت لك راسك بس انت هاتروح تلاجى مرتك عامللك شاى وجهوة وتديك اسبرينة .. بس جولى يا خويا انت بتاخد

اسبرينة كده زينا لما راسك توجعك .. اصل الراجل كل ما اشكى له من بطنى والا راسى والا صدرى يجولى روحى الاجزخانة خدى اسبرينة .. هى الاسبرينة بتعالج كل حاجة يا خويا .. طيب المشتشفى ده بيعملوا فيها ايه .. هى للعمليات بس .. اسكت يا خويا مجلكش الولد بن عمى دخل المشتشفى وفضل هناك شهر وخرج على الطرب طوالى .. من ساعتها يا خويا كل ما الراجل يجيب السيرة اجوله تف من بوجك اوعى تجيب سيرة المشتشفى ده تانى على لسانك .. والله الكلام معاك حلو يا سيسى بس رد عليا .. انت مش بترد ليه .. هو طلباتى كتير .. بس انت قلت هاتحن علينا .. حن عليا يا سيسى .. والنبى حن علينا يا سيسى..................