اشتعال "حروب" الأنترنت بين مؤيدي ومعارضى أحداث يناير 2011

اشتعال "حروب" الأنترنت بين مؤيدي ومعارضى أحداث يناير 2011

جروب "أمسك جيمى" على "تويتر":

"المصري اللي على حق ميقولش لحملة القبض على جمال مبارك لأ"
"مبارك يطلب تعيين جمال رئيسا للجمهورية بإعتباره من ابناء العاملين".
جروبات سلبيات "ثورة" يناير:

المتظاهرون اتسموا بالانحطاط الأخلاقى وخربوا البلاد

كتب محمود خليل:
طالبت حملة على "تويتر" بعنوان "امسك جيمى" للقبض على جمال مبارك ومحاسبته على ما وصفوه بوقائع الفساد التى تورط فيها هو والمقربون منه من أصدقائه رجال الأعمال الذين ساعدهم على نهب مصر ونشر الفساد السياسي والاقتصادى بها فى السنوات الأخيرة.

كانت أبرز تعليقات القراء ننشرها كما هى بالأخطاء اللغوية والإملائية كما يلى:
إللى كان بيحكمنا آخر سنين جمال وهو أهم من مبارك وأكيد ليه يد فى قتل الشهداء لازم يتحاكم عشان لو وقع ناس كتير هتقع.
ميزة جمال يا ولاد إنو متفق عليه من مصر كلها مش هنلاقي حد يقولك عيب ده راجل قد أبوك بلعكس الشعب هايواجب جامد معاه ويعمل حملات شعبية للقبض عليه 

.
من أحلامي أشوف عمر سلامة ومحمد دياب عاملين فيلم "ليلة القبض على جمال مبارك" ويكون مأخوذ عن قصة واقعية.
عشان جمال ما يتهببش يمسك الحكم في انتخابات 2015 لازم يتحاكم دلوقت بتهم مخلة بالشرف تحرمه من حق الترشح 5 سنين.
حملة إمسك جمال مبارك هي ده فعلا إللى بنطبق عليها شير فى الخير.
إمسك جمال عشان قاعد ماضيها شرم لندن و بيتمتع ب توك توك الاستقرار ، وبلاش خديجة علشان لو خطفناها هنبيع الشعب علشان نكفي مصريفها لحد ما يدفعوا الفدية.
امسك جيمى عشان بيأجر فى شرم الشيخ عجل الإنتاج بالساعة.
امسك جيمى مفجر ثورة الفساد .
المصري اللي على حق ميقولش ل حملة القبض على جمال مبارك لأ.
امسك جيمى عشان تتطمن على مستقبل أولادك و أحفادك.
من الآخر جمال مبارك مفيش حد هيختلف عليه لا شعب ولا جيش بيحبوه واحتمال مبارك نفسه يكون كرهه.
اظن بقى محدش هيطلع يقولنا إن جمال قتل وأتقتل ولا مقضيها كروزة بطيارة حربية.
حماده هلال: جمال مبارك, ابن الرئيس السابق محمد حسني مبارك ومبارك يبقي أبوه.
شوهد آخر مره في منتدى لرجال الأعمال وكان مغير تسريحة شعره .
مطلوب للمحاكمة من 85 مليون مصرى مش للسجن وكل واحد ياخد حقه بطريقته لأمؤاخذه.
اسمه جمال ؟ يبقي متورط في موقعة الجمل 

.
عيل وشبط في بلد بحالها تلاقيه دلوقتى بيعيط لابوه وبيقوله خدوا مني الحزب يا بابي وعايز واحد تانى مليش دعوة وابوه يقوله الله يحرقك منا خدوا مني البلد كلها.
يا جيش إمسك الواد ده لا أنتم بتطيقوه ولا إحنا بنطيقوه فا الجيش والشعب إيد و رجل واحدة فى الحوار ده.
بيقولوا جيمي بعد التنحي قعد يعيط ويقول لأبوه وأنا مالي انت قلتلي مصر دي بتاعتي أنا عاوز مصر بتاعتي.
أخص عليكوا ناكرين الجميل... أحنا أسفين يا جيمي
تعاطفك لوحده مش كفاية شارك ولو حتى بقلمين .
الواحد يورث ارض يورث عربيه يورث شقه مش يورث بلد يا خيبيتها دي بلدنا وأبوك كان شغال عندنا رئيس جمهوريه وماعجبناش ومشيناه.
خبر قديم: عرافة لبنانية تتوقع وصول جمال مبارك للحكم عام 2011 ... آدى أخرة المشى ورا الدجالين.
مبارك يطلب تعين جيمى رئيس للجمهورية بإعتباره من ابناء العاملين.
ده انت هتتعملك زفه لوززززز وانت داخل بورتو طره لأصحابك ده انت ليك معزه خاصه عند كل الشعب المصرى ماشاء الله.
إمسك جمال مبارك وهتحصل على صفوت وسرور وعزمي فى عبوة أنيقة ملفوفين فى كلابشات حديد عز .
من ناحية أخرى نشر على الفيس بوك رسالة افتراضية ساخرة يتبادلها المصريون على الموقع تخيل كاتبها أن جمال مبارك بعث بها كمواطن مصرى عادى إلى بريد الأهرام عام 2041 يشكو فيها تعرضه هو وعائلته للظلم الشديد من قبل شعب مصر .
فهو يشكو من أن التوريث فرض عليه فرضا وأن شعب مصر بأكمله كان ينازعه هو وعائلته على ملكية قطعة الأرض التى يملكها والده والتى تمتد من البحر المتوسط شمالاً حتى السودان جنوباَ، ومن البحر الأحمر شرقاَ حتى ليبيا غرباَ.

كانت تعليقات القراء على هذه الرسالة ننشرها أيضا بدون تدخل منا بكل الأخطاء اللغوية والإملائية كما يلى:

انا مش عارف هو الجيش ليه مش بيقبض على جمال مبارك وهو أوس الفساد فى البلد مهو اللى خربها بشلة رجال الأعمال اللى كان لاممهم حواليه كأنها عزبة أبوه وعمال يقسم عليهم البلد ولا يعنى عشان هو ابن الرئيس مش هيتحاكم
يعنى قبضوا على عز وحاكموه وسابوا اللى جابوه المفروض جمال مبارك يتحاكم على كل قضايا الفساد اللى فى البلد لأنه متورط فيها سواء بشكل مباشر أو غير مباشر

انا مش عارفة ايه البجاحة دى سارقين البلد ومخربينها ورايحين يتعزموا كمان ويرفهوا عن نفسهم فى نادى رجال الأعمال دول المفروض يروحوا نادى الحرامية فى لمان طره هو ده النادى الوحيد المناسب ليهم بجد حاجة تنرفز مش عارفة ليه الجيش لحد دلوقت مقبضش لا على جمال ولا صفوت ولا سرور ولا حتى زكريا عزمى هم يعنى معملوش حاجة خالص فى البلد دول خربوها ولسة بيخربوها وبيحاربوا الثورة يا حرام قطعت قلبي يا خويا ده فعلا شعب مفترى ظلمك انت وأهلك أقولك على حاجة.. أنا لو مكانك آخد أول طيارة واسيبها لهم

لا صعبت على بصراحة ده شعب رخم قوى يا جدع اللى عمال يزاحمك انت وأهلك على الكام فدان اللى حيلتكم وانتم يادوب كل اللى تتحكموا عليه كم مليار بس شعب قليل الأدب صحيح هههههه"

يا جماعة كفاية ظلم بقى جيمى وعيلته اتعذبوا كتير ولازم نعمل لهم مسيرة رد الجميل بس بعد ما يدفعوا اللى عليهم وزى ما ماما سوزان كانت بتقول القراءة للجميع احنا بقى بنقول فلوس آل مبارك للجميع وشير فى الخير

من جانب أخر انتشرت العديد من الجروبات على موقع الفيس بوك تسجل سلبيات ما اطلق عليها "ثورة 25 يناير", واسمتها الصفحات "نكسة 25 خساير", بسبب الخسائر التى تعرض لها الوطن والمواطن بسبب تلك الأحداث التى تعرضت لها مصر خلال الفترة الماضية.

وسجلت تلك الجروبات تلك السلبيات نتيجة اضطربات يناير فيما يلى:
انتشار الفوضى وخروج المساجين سواء من السجون أو أقسام الشرطة وحدوث أعمل سرقة ونهب للمواطنين وسرقة المحلات وسرقة المتحف المصرى, وفى هذه الفترة شهدت مصر أبشع  الجرائم من سرقة ونهب بخلاف الخوف والذعر الذى انتاب المواطنين.

تنتقد الجروبات النداءات التى اطلقها المتظاهرون وأن مظاهراتهم مظاهرات سلمية وقالوا:

نعم سلمية وقاموا بأعمال البلطجة

نعم سلمية ومع ذلك لا يعترفون بالديمقراطية ويتهمون كل من يتحدث عن مبارك بالخير بالخيانة

نعم سلمية وهم يحرقون أقسام وسيارت الشرطة

نعم سلمية وهم يعتدون على البنوك ومكاتب البريد ويسرقونها

نعم سلمية وهم يعطلون المواطنين عن اعمالهم

نعم سلمية وهم يسبون ويجرحون ويسئون للأخرين بألفاظ يندى لها الجبين

نعم سلمية وهم يحرقون المحاكم والمستشفيات. 

كما نشرت الجروبات العديد من الخسائر التى تعرضت لها مصر نتيجة توقف الإنتاج فى كافة المصانع, وتوقف أعمال البورصة والبنوك, وتوقف عمليات التصدير والاستيراد, وتوقف النشاط السياحى, وتوقف الطيران وغير ذلك من الخسائر.

كما رصدت الجروبات عمليات الأعتداء على الأرواح وعلى الفتيات والسيدات وأعمال النصب والأستيلاء بالقوة على الممتلكات من أموال وسيارات وغيرها.

رصدت الجروبات ايضا الانحطاط الأخلاق الذى ظهر عليه المتظاهرون من خلال شعاراتهم ولافتاتهم ومن التعامل مع المخالف لهم فى الرأى.